اول يوم فى الجامعة ..... فاكرينه ؟؟

فكرت فى فكرة كدة و مش عارف هتعجبكوا و لا ايه

عموما زرار الحذف موجود

لو ما عجبتكوش الفكرة

يبقى أحلى حذف عشان خاطر أحلى صحاب

المهم و من غير رغى كتير

الفكرة هى أن كل واحد يدخل يقول ايه اللى حصله فى أول يوم نزل الكلية

و قابل مين و حضر محاضرة ايه و اتعرف على مين و كدة يعنى

و أنا هبدأ بنفسى

أنا أول يوم فى الكلية جيت الساعة حوالى 9.30 صباحا

و كان عندنا محاضرة د.جيهان

و طبعا بادئة كالعادة من الساعة 8

و انا زى الشاطر داخل أجرى ملتزم بقى و خايف المحاضرة تفوتنى

لقيت اللى بتبصلى و بتقولى

" مش تستأذن يا بطيخة و انت داخل "

طبعا أخوكم وشه جاب ألوان الطيف

قولت فى سرى " أول القصيدة بطيخة " يارب هتختم على ايه ؟؟

المهم رجعت تانى و خبطت على الباب و بعدين دخلت

و بعد المحاضرة اتعرفت على على فواز و ده صديقى

و اتعرفت على واحد برده اسمه أحمد رضا

و للمصادفة السعيدة الاتنين لسه فى سنة تالتة

واضح انهم نحس

و بعد المحاضرة طبعا خدت كشكولى

أيام ما كنت بشيل كشاكيل

و روحت طبعا

ما كنتش لسه أعرف السلالم و لا الجنينة و لا الحاجت دى

كنت لسه أخضر

عموما ده كان أول يوم ليا فى الجامعة

و ياريت انتوا كمان لو فاكرين أول يوم فى الجامعة تحكوا لينا إيه اللى حصل

و بس خلاص عشان انا رغيت كتير اوى

عدل سابقا من قبل Shams في 2009-06-06, 11:45 pm عدل 1 مرات

والله موضوع حلو يا بندق
وأول يوم ليا ف الجامعه ده كان من زمان
أول محاضرة كانت للدكتور الجميل والأكتر من رائع
د/ مصطفى جمعة
كانت محاضرة ترجمة
كنت لسه مش عارف حاجة
وأنا ماشى ف الطرقة جنب القاعات
مكنتش لسه أعرف الدكتور مصطفى
فوقفت عنده وسألته لو سمحت أنا لسة أول يوم ليا ف الجامعه أعمل إيه
قاللى تعالى معايا
ودخلت حضرت المحاضرة
وحبيت الجامعة بسبب الدكتور مصطفى

- اها ومن كتير حبك للجامعه ياشريف مش عاوز تسيبها متبت فيها بايديك وسنانك مش كده ؟؟؟
- أما انا بقى يابوجمال فاول يوم ليا حضرت برضو محاضرة الدكتوره جيهان بس حاسب انا حضرتها من اولها بس برضو دخلت بعد ما دخلت
وحصل معايا موقف جااااااااامد :
انا داخل من الباب اللي ورا و المحاضره دي كانت في مدرج (ب) انا فاكرها كويس . فانا داخل الولاد كانو قاعدين على شمالها والبنات على يمينها فانا طبعا رايح اقعد مع الولاد. لقيت اللي بتتكلم وبتقول ايه اللي انتو عاملينه ده انتو في جامعه لازم تتعرفو على بعض ، قاعدين بعيد عن بعض ليه هو مش هياكلك الخ . فلقيت اللي راحت مقعداني جنب البنات ، انا طبعا وشي ضرب الوان (ههههههههههههههههههه). لسه اول يوم بقى .
المهم قعدت وبدأت الدكتوره تتكلم وطبعا استخدمت اسلوب الترهيب اللي كنا عارفينه . لازم تذاكر 8 ساعات في اليوم والقسم بتاعنا اسمه (المفرمه) والكلام اللي انتو عارفينه ده. وفي وسط المحاضره انا طبعا قاعد مركز معاها وبكتب وراها اللي بتقوله، طبعا لسه اول يوم بقى داخل سخن ، لقيت اللي بتقول انت شكلك طالب ملتزم وهادي ( الكلام ده عليا انا ).وشكلك هتبقى من الاوائل وفعلا بقيت من الاوائل بامارة منا لسه في سنه تالته (هههههههههههههههه)
واول ناس اتعرفت عليهم كان جمال وصحابه حتى كانت لسه نتيجة الاقسام مظهرتش ، محدش دخل القسم منهم غيره فاكر يا جيمي ؟
بس وآدي اول يوم ليا في الجامعه .
فكره حلوه اوي يا بندق فكرتني باللذي مضى .

انا اول يوم لي في الجامعه يمكن يكون مختلف شوية لاني ساعتها ماكنتش طايق الاكاديميه بس بجد عرفت ناس والحمد لله من خيرة الفشله عرفوني يعني ايه جامعه ويعني ايه مذاكره في اخر اسبوعين وازي تعرف تلم نفسك بس انا مش مشيت عالكلام ده غير في سنه تانيه الكام محاضره اللي لحقتهم في اولي ترم والترم التاني كنت ملتزمالحمد لله

والحمد لله هم يومين وحلفت اني لازم اكون محول منها وجيت علي الكليه عندنا وبجد كان من اهم قرارات حياتي ومن انجحها في وجهة نظري

اول يوم لي قابلت فيه كريم واسامه وتلاته كمان واحد منهم دخل فرنساوي والتاني دخل تاريخ والتالت كان معانا في القسم بس مش شفته تاني سمعت انه سافر الكويت يشتغل والطبيعي ومن بختي الحلو كانت اول محاضره لي مع د/ جيهان ويوميها قعدت تقول اننا بنسبة 90% ساقطين لاننا جايين في الاخر وبعديها محاضرة د/ عبدالحليم ودي غنيه عن التعريف

بعديها بقي عرفت احمد جمال وايمن واحمد خليل وجمال وعبدالله وفتوح ومصطفي وبقية الشله اللي بجد قضيت معاهم فتره من احلي فترات حياتي وكانو نعم الاصدقاء

وبالنسبه للسلم فأعتقد اني واخد التوكيل من سنه تانيه تقريبا يمكن سنه اولي كان خفيف لاني ماكنتش بنزل كتير

وكان معظم وقتي هناك لاني ماكنتش بحضر غير المحاضرات المهمه بس

ده كان اول يوم اسف علي الاطاله بس غصب عني والله انا عايز اتكلم لحد الصبح

انا بقى اول يوم ليا فى الجامعه الحقيقه مش فاكره خالص

انتوا ناس تشل على فكره

هو انا فاكر انا اتغديت ايه

عشان افتكر حاجه من اربع سنين

هو انا مش فاكر تفاصيل من سنه اولى غير انى مكنتش بحضر الا محاضره الشعر للدكتور رضا وكانت محاضره جميله

جدا وريحه مصنع الصابون كانت بتعمينا الصراحه ههههه

وفى سنه اولى اتعرف على عبد الله والطاهر واحمد خليل وسى الاستاذ سعيد كوراعه والسيد حمدى

واهى سنين تفوت وتمر ويجرى بينا العمر

انا اول يوم ليا ف الجامعة كان غريب اول القصيدة كفر زى مابيقولو
دخلت الكليه دى انا واتنين من صحابى المهم صحينا وعدينا على بعض وروحنا المحطة طبعا
وركبنا القطر ونزلنا عالكليه
ومكناش لسه معرف اى حاجة ولا اى حد ولاقينا واحد بيتكلم بيقول للدفعة الجديدة رئيسة قسم ارشاد عامله ليهم محاضرة تعارف .....فنزلنا وجالى تليفون فرديت عليه والمكالمة طولت شويه ولما خلصت ملقيتش صحابى
فوقفت بدو ف كل قاعة على المكان واخيرا لاقيتها
وواحد من صحابى دول رايح مصفر ليا ف وسط المحاضرة وقالى ياماهر تعالى احنا هنا
كنا فاكرين نفسنا ف ثانويه عامه المهم دخلت باحترام واستاذنت فالدكتو بتقولى مين اللى صفر ليك ده
فقولتلها معرفش قالتلى حتخرج برة فهو راح قايم قالها انا يامس
قالتلو مس ف عينك انا اسمى دكتور تعالى هات الكارنيه بتاعك ولا بطاقتك وندهت المسؤل عن القاعة قالتلو هاتلى الامن
والمشكله كبرت واخدت اسمو
وشال السنة على كدة وحول منها وصاحبى التانى سقط وحصلو على تجارة الزقازيق هههههههههههه

ههههههههههههههههههههه
بجد بجد
انتوا مواقفكم بهدله
انا مش فاكرة حضرت محاضرة مين اول سنة
بس كنت لوحدى وكنت خايفة موت ومكسوفة اكتر
بس لقيت واحدة صحبتىمن ثانوى وقعدت معاها
وكنت من المحاضرة للبيت ومن البيت للمحاضرة
دة اول شهر بعد كدة
اتعرفت بقى على الشله صدفة
بس معلش لازم اقول ان كان حظى وحش جدا انى متعرفتش على محمد من اول اولى
لانة بجد ونعم الاخ ليا وبحبه قد اخويا كريم وهو عارف تقريبا
كنت بشوفه ف النص التانى من اولى واتكلمنا ف تانية
وبجد هو ونعم الاخ والصديق وشخصية اعتز بيها طول عمرى
معلش طولت عليكم

بجد يا بندق فكره جامده
اول يوم ليا فى الكليه ده لا يمكن انساه
انا كنت فى كلية العلوم وكنت محول لآداب انجليزى ومكنتش اعرف اى حد ولا اى حاجه
دخلت الكليه اول يوم, بصيت عالجدول مكنتش فاهم فيه حاجه المهم اتلاقيت واحد ابن حلال عرفنى ان عندى محاضره فى مدرج ب ويا ريته ما عرفنى
وانا طالع المدرج الساعه 9 اتلاقيت بنات واقفين عالباب بيستاذنوا عشان يدخلوا, فطبعا استنيت لحد ما الدكتوره جيهان شاورتلنا عشان ندخل
وانا داخل افاجئ بكمية تهزيئ لحد معين بس مين هو معرفش وانا ماشى عمال اقول فى سرى هو مين الشخص اللى معندوش كرامه ده اللى يسمح لحد انه يهزاه كده من غير ما يرد حتى او يدافع عن نفسه
محطتش فى دماغى وداخل جرى من اخر المدرج فاتفاجئ ان الكلام كان موجه ليا انا
طبعا حسيت ساعتها ان فى حد خبطنى بشومه على دماغى وقفت لحظه كده مذهول كنت حاسس ان هيجيلى تخلف عقلى وعمال اقول لنفسى هو انا عملت ايه , وانا واقف
محسيتش بنفسى بعد كده غير انى برد عليها بنفس الطريقه بتاعتها وكانت النتيجه انى شيلت الماده وكنت هسقط
وطبعا ده خلانى محضرش خالص فى الكليه باستثناء محاضرة د/ مصطفى جمعه ونادر جدا محاضرة دكتور رضا ودكتور احمد صلاح لحد مادخلت سنة 3 ومكنتش اعرف حد غير صيام اتعرفت بعد كده على جمال وبندق والطاهر واسامه وشريف واحمد خليل وبقيت الشله

اول يوم فى الجامعة ..... فاكرينه ؟؟ Xp0010

اول يوم فى الجامعة ..... فاكرينه ؟؟ Xp0010