أوباما سوبر مان العالم

موضوع: أوباما سوبر مان العالم 2009-06-03, 6:43 pm

وسط ترقب من العالم كله لزيارة الرئيس أوباما إلى القاهرة
و بعدما أثير الجدل حول اختياره القاهرة لمخاطبة العالم الإسلامى
يبقى المصريون و العالم أجمع فى حالة تفاؤل محدودة بهذه الزيارة
تأتى أهمية هذه الزيارة عالميا بانها إعادة هيكلة للسياسة الأمريكية تجاه المسلمين و العالم الإسلامى
و تأتى أيضا لأنها أولى زيارات الرئيس الرابع و الأربعون للولايات المتحدة إلى الشرق الأوسط
و على الجانب الآخر فهى بلا شك تحظى بترقب إسرائيلى حيث يكشف الرئيس الأمريكى عن نواياه
تجاه العالم الإسلامى الامر الذى يهم إسرائيل كثيرا حيث ستعلم إذا ما كان أوباما ينوى العدل و هو ما لا تريد إسرائيل
أم أن أحـــاديث و وعود أوباما هى مجرد تصريحات دبلوماسية للاستهلاك الإعلامى و الدعائى و مجرد تسكين للآلام
و على الصعيد الداخلى المصرى فنحن نرى استعدادات غير مسبوقة و تجميل لمنطقة جامعة القاهرة و القلعة
و نرى تحركات أمنية مكثفة و تدريبات على أحدث السبل لتأمين الموكب الأمريكى و هذا حق الضيف علينا و لا خلاف

و لكن ما استوقفنى أنا بشكل شخصى هو كمية البشر و الكتل و القوى السياسية التى تستنجد بأوباما و تبعث له خطابات
فكل من لديه مشكلة فى تعيين ابنه فى وظيفة أو له محل بقالة و الحكومة أغلقته بداعى عدم وجود تراخيص
كل هؤلاء يتجهون لأوباما لحل مشاكلهم و أنا أعتقد أن أوباما ليس سوى بشرا رئيسا و ليس نبيا يوحى إليه
أو ليس ساحرا يمتلك مفاتيح الجن

هو رئيسا لأكبر دولة فى العالم .... نعم صحيح ..
و لكن لا يعنى ذلك ان
" كل من هب و دب صابع رجله الصغير يتخربش يناشد أوباما بثمن الشاش و الميكروكروم " ؟؟؟
وقفت عند الإخوان .... و الصحفيين .... و حركة كفاية .... و عمال شركة " دارى على شمعتك " لانتاج الفول الحرايتى
و بشر لا أول لها و لا آخر ........ لابد أن نتحلى بثقافة الاعتماد على النفس و نعتاد على حل مشكلاتنا بنفسنا
و لا ننتظر عصا أوباما السحرية أو تدخلات الرئيس الجهنمية ..... نحن قادرون على فعل أى شئ و كل شئ نريده
و لا نعلق آمالنا على أحد سوانا ..... فنحن من نملك مصيرنا و نحن من نستطيع فعل ما نريده و ليس الرئيس الضيف
و دعونى أتسائل
...... إذا كانت زيارة باراك أوباما هى 8 ساعات تبدأ من العاشرة صباحا
موعد وصوله و يستقبله في مطار القاهرة الرئيس حسنى مبارك ثم يصطحبه إلى
قصر القبة حيث يمكثان هناك 45 دقيقة، ليذهبا بعدها في جولة بالأزهر
بمرافقة العلماء الذين سيشرحون لأوباما معالم وتاريخ الجامع الأزهر.
ويزور الرئيس الأمريكى مسجد السلطان حسن قد استعدت هيئة الآثار المصرية بازالة أكوام القمامة المتاخمة
لشارع المعز لدين الله الفاطمى الكائن خلف الجامع الأزهر والذى يمتد حتى
مسجد السلطان حسن و قد يتطلع لزيارة منطقة الأهرامات .
ويلقى أوباما خطابه فى جامعة القاهرة فى تمام الساعة ١٢ و٣٥ دقيقة ظهراً،
ويستمر الخطاب لمدة ساعة، يعقد بعدها لقاء وطاقم السفارة الأمريكية
بالقاهرة، ثم يغادر مصر الساعة السادسة مساءً.

إذا أين الوقت لكى يتحدث أوباما عن مشاكل الأقباط و الصحفيين و الإخوان و الإصلاح و كفاية و الجماعات الاسلامية
و هو أيضا لديه ما لديه من مناقشات مع الرئيس بشأن " إيران " و بشأن " المبادرة العربية و حل الدولتين " و " العلاقة الثنائية " ؟؟؟؟

أعتقد أنه كى تتسق الأمور و تبدو منطقيه لابد من حل من الحلين :

إما أن يتولى أوباما حكم مصر بجانب الولايات المتحدة
على اعتبار مصر الولاية الواحد و الخمسون

و إما أن يبنى أوباما بيتا أبيضا فى منطقة المعادى أو جاردن سيتى
ليكون ملازما للمصريين " الغلابة " و يحل لهم مشكلاتهم

موضوع: رد: أوباما سوبر مان العالم 2009-06-04, 5:36 am

بداية أحييك علي هذا الموضوع
الاكثر من رائع وعلي طريقة صياغة الموضوع وهو ماليس بجديد

ولكن اعتقد ان كلام اوباماوتصريحاته
ليست مجرد دبلوماسية او للاستهلاك الاعلامي وفقط ولكنها حقيقه فعلا فالرجل يريد
انهاء حالة الصراع الموجوده في الشرق الاوسط واهمها القضيه الفلسطينيه والدليل علي
ذلك الخلافات الكبيره الدائره حاليا في
الكونجرس بينه وبين اللوبي الصهيوني والكل يعلم مدي تأثير هذا اللوبي علي الاقتصاد
الامريكي والسياسه الامريكيه حيث لايتستطيع اي مرشح رئاسي الفوز في الانتخابات
بدون مساندتهم

وليس معني هذا ان الرئيس الامريكي
سيقف في جانب العرب ضد اسرائيل ولكنه يحاول اصلاح ولو جزء بسيط من الاتجاه العربي
العام تجاه امريكا وتغيير صورة امريكا في الشرق الاوسط وخصوصا العرب والدليل
تعيينه لاحمد زويل كعضو في المجلس الاستشاري واختيارة ايضا لمستشارة دينيه .

الرئيس الامريكي لدية من الفطنه
والذكاء مايجعله يحافظ علي علاقته بالعرب وعدم اخذ جانب معادي ضدهم او ضد الاسلام
، جزء من هذا الفكر هو فكر اقتصادي بحت نتيجة التوقعات بانخفاض الاحتياطي
الاستراتيجي الامريكي من النفط وهو ماله تأثيرة الكبير ليس علي امريكا وحدها بل
العالم كله نظرا لان معظم انتاج النفط في ايدي العرب ( هم كده كده بيسمعو الكلام
بس ماحدش يضمن الظروف) هو لايريد ان يعادي العرب ولكنه اضا لايستطيع ان يعادي
اسرائيل حفاظا علي مصالح امريكا وكما قال وزير الخارجه المصري ( السياسة مافيهاش عواطف ) بالتأكيد هناك مكاسب
يريدها اوباما من القائه للخطاب سواء سياسيه وهي متعلقه بنظرة العاالم العربي والاسلامي
لامريكا واقتصادية متعلقه بالبترول وماالي ذلك من استثمارات للعرب في امريكا .

لمتابع لندوات الرئيس الامريكي الانتخابيه
كان سيلاحظ اعتماده في سياسته مع العرب علي حد قوله مايسمي ((soft power وهي ماتعني استخدام الاساليب الترفيهيه في التأثير علي الشعوب العربيه و(كنتاكي
وكوك دور والموبايل وماالي ذلك) .

ولكن مع هذا الاهتمام الجيد من الرئيس
الامريكي بالقضيه الفلسطينيه وتأكيده علي حل قيام الدولتين كسبيل عادل لتحقيق السلام
فان الخوه الفلسطينين يعقدون الامور اكثر بتشتتهم وانخراطهم في مشاكل داخليه لاطائل
من ورائها وفي اعتقادي الشخصي انهم بداية من هنية وابومازن وحتي ابو عباس لاناقة لهم
ولا جمل وليس لديهم مايقدموه للشعب الفلسطيني الذي يعاني وهم يتمتعون بكافة وسائل الرفاهية
.

وجاء اختيار اوباما لمصر لالقاء خطابة
لمعرفته وتقديرة لدور مصر في الشرق الاوسط وقناعته بحكمة الرئيس مبارك السياسيه والتي
لايختلف عليها حتي المعارضون وكما قال علي حد قوله ان الرئيس مبارك هو ركيزة الشرق
الاوسط وليعلم الفلسطينيون انهم امام فرصة
لابد من استغلالها واستغلال مؤتمر المصالحه الاخير الذي اقامته مصر وضرورة الاتفاق
علي ممثل لهم يستطيع ان يقوم بالتفاوض نيابة عن الحركات كلها والا يتحملون عواقب
عنادهم وجهلهم وكما قال رئيس الخارجيه ايضا معقبا علي هذه النقطه ( احنا مش
هانحبسهم عشان يتفقو مع بعض لو ماتفقوش هم احرار) .

هذه مجرد وجهة نظر قد تكون صحيحه وقد
يتجنبني الصواب.

موضوع: رد: أوباما سوبر مان العالم 2009-06-05, 3:34 am

طبعا يا حمادة وجهة نظر رائعة

و بتفق معاك فيها

انا اللى استوقفنى كمية البشر اللى بتعول على أوباما

فى حل مشاكلنا احنا

و احنا ان شاء الله ناوين نفوق و نفضى شوية كدة و نحلها امتى

ربنا يسهل للشعب ده بقى

موضوع: رد: أوباما سوبر مان العالم 2009-06-15, 1:34 am

والله يابندق هي المشكله مش في الشعب هي المشكله في السياسه اللي بتحاول الحكومه تفرضها علي الشعب انك يبقي همك الوحيد ازاي اكل واشرب وربنا يديني العمر والاقي شغل وتعد طول عمرك تدور علي الشغل اللي نفسك فيه عشان تكون حاجه وطبعا بتقابل حاجات كتير جدا وانت ووقدرتك ونفسك بقي ياطويل وتقدر تكمل وتحاول مره واتنين ياتاخدها من قصيرها وترضي بنصيبك

موضوع: رد: أوباما سوبر مان العالم 2009-06-15, 4:52 am

انا بجد معاك يا احمد ف كل اللى قولته
هو مش نبى ولا سوبر مان
دة بشر زيوا زينا
لية ما نحولش نحل مشاكلنا بادينا
دا انا مش قادره اقولك على كمية الاستعدادات اللى حصلت علشان جاى
انا ما سمعت اللى قالوه ف التلفزيون بجد كنت هنشل
فية اية اه رئيس اقوى دوله مقولناش حاجة
وبعدين بقى سورى انا حسيت انه جاى ينيم الشعب المصرى
اول ما جه وقال السلام عليكم بالعربى
الناس قامت سقفت وعملت قلبان
كل دة على السللام عليكم
يا احمد بجد احنا ف بلد مايعلم بيها الاربنا
بص علشان مش بكون بفتى انا مش سمعت الخطاب كله
بس عرفت من الاخبار
وعرفت انة بينيم شعبنا وعايز يكسبه ف صفة
وهيحاول انة يحل النزاع الفلسطينى الاسرائيلى بس بشروط
ميجيش على حق الدوله الاسرائيلية
وبكرة يا ااما هنشوف
بجد بجد سورى احنا شعب برياله بيضحك علينا
طول عمرنا رجاله مش فاهمة ايه اللى حصل ؟
ما نحل مشاكلنا بنفسنا ؟ حاجة غريبة والله شعب غريب؟؟

موضوع: رد: أوباما سوبر مان العالم 2009-06-15, 5:10 am

ده أوباما مش الحاج عبد الرازق الفاططرى

طبيعى هيقول ان اسرائيل ليها حق فى الوجود

خلينا واقعيين و بلاش شعارات

مش هتختفى

بس على الاقل الراجل بيتكلم كلام كويس و منطقى

باقى التنفيذ

و انا متفاءل بيه فى حدود انه بشر يمتلك قدرة على التغيير و الاقناع و الحل

ميرسى على تشريفك للموضوع يا رضوى

موضوع: رد: أوباما سوبر مان العالم 2009-06-15, 9:31 am

بص ياحمد زى منت عارف طبعا انى حمار سياسه ومليش فيها

خلينا نشوف هو ناوى يعمل ايه
وزى منت قلت هو بشر بس بيمتلك القدره انه يعمل حاجه كسلطه اولى فى العالم والقادر هو الله سبحانه وتعالى على كل شى

بس خلينا نشوف ناوى يودى العالم على فين

بوش ودانا فى ازمه عالميه
وازمه فى مصر بالذات بعد اما ضرب العراق

وغيرها من الماصيب الى كان بيعملها

نشوف بقى اوباما ناوى على فين
وانا متاكد طريقه طريق كلينتون واذدهار عصره بالاقتصاد والسلام

والى يعيش ياما يشوف

موضوع: رد: أوباما سوبر مان العالم 2009-06-15, 9:32 am

اها معلش نسيت اعلق نقطه كده

هو فعلا دلوقتى سوبر مان العالم

علشان العالم كله مستنى يشوف اوباما يعمل ايه هيغير سياسه امريكا فى الشرق الاوسط ولا على فين العزم مودينا

» العالم الي اين؟؟؟؟؟
» اهداف مباراة مصر والبرازيل فى بطولة كأس العالم للقارات 2009
» لسنا أسياد أفريقيا و لكننا أسياد العالم