اعرف حقك .. عشان تعرف تاخده ( الحلقة الثالثة )

الحملة دى حملة انا عملتها و ماكملتهاش و بلاش اقولكم ما كملتهاش ليه
المهم انى عايز اخواتى فى المنتدى يقروا الجزء اللى اتعمل فيها و ربنا يقدرنى و اقدر افيدكم على قد ما اقدر

الحملة حلقات حوارية ياريت تتابعوها


انا و شاب مصرى بسيط اتعودنا نركب المترو سوا من شبرا و
هو ينزل جامعة القاهرة عشان شغله و انا الدقى بنزل عشان شغلى قريب من هناك
كل يوم نتقابل فى المترو فابتدينا نتعرف ... هو اسمه بيومى و يوم بعد يوم
ابتدينا ندردش شوية مع بعض ( طبعا ده مش حقيقى و لكنها وسيلة ... على اى
حال تعالوا نتخيل و نعيش فى الخيال ده شوية )
و ده الحوار اللى دار بينى و بينه
تعالوا نشوف الحوار اللى دار بينى و بين بيومى النهاردة

- صباح الخير يا بيومى
- صباح النور
- ازيك عامل ايه
- الحمد لله تمام
- احنا كنا اتكلمنا المرة اللى فاتت عن الحقوق لو تفتكر
- طبعا فاكر بس ايه الفايدة.. انا حقى متاخد
- انا معاك بس ينفع تاخد حقك و انت متعرفوش و متعرفش الوسائل الدستورية اللى تاخد بيها حقك
- طب عرفنى جايز افهم
- لازم تفهم .... لو مافهمناش حقنا هنفهم ايه
- طيب يلا انا جاهز
- بص يا بيومى الاول احنا عاوزين نعرف ازاى نعترض و ثقافة الاختلاف مع الهيئات الحكومة و السلطة التنفيذية
- ماشى
- الليبرالية.......
- لا انت كدة مش حلو .. انا اسمع ان الليبرالية وحشة و شيوعية و علمانية
-
دى فعلا الليبرالية زمان عند شرق أوروبا عندك حق .. بس احنا مفيش مانع
ناخد الحاجات اللى هتفيدنا و نطعمها بتقاليد مجتمعنا و نشيل منها المبادئ
العلمانية بمعنى تانى اليبرالية المصرية الحديثة اللى انا عاوزها تختلف عن
الليبرالية الشرقية و الليبرالية الاشتراكية
أنا بتكلم على الليبرالية بما تحمله من حرية تعبير و حرية فكر و ضرورة تغيير و
اصلاح و النظر إلى المجتمع و مشاكله و محاولة حلها و تداول السلطة السلمى
عن طريق شرعى ديمقراطى و دستورى و ملهاش دخل فى الدين
الدين واضح فيه المعاملات السياسية اللى مش لازم ننكرها
الليبرالية انك تتمتع بالامن و الامان على أرض بلدك و تعبر عن رأيك المعارض بحرية بس بنقد بناء
و تبدى التغيير بنفسك
- يعنى ايه ؟
- اقولك يعنى مثلا بدل ما نقول التعليم وحش و بايظ و كوسة و شوربة لا نقول التعليم فيه أخطاء و هى 1 2 3 4 و مقترحات حل هذه المشكلات
1 2 3 4 و ياريت الحكومة تعمل و تنفذ او حتى تناقش هذه المقترحات
هى دى ثقافة الاعتراض من أجل الوطن مش الاعتراض من اجل الاعتراض
-و الله عندك حق كمل
-و كمان الليبرالية تكفل حقوق الانسان و حرية الصحافة إيمانا بأن الصحافة هى رقيب السلطة التنفيذية و ضمير الأمة و حلقة الوصل بينهم
- جميل
-الليبرالية كمان ادواتها هى الدستور و القانون مش الكلام و الجعجعة يعنى اهم من انك
تتكلم انك تتسمع ايه فايدة الكلام و انت صوتك مش مسموع و صوتك هيكون مسموع
و واضح لو صوتك منخفض و معاك شرعية و عندك وعى
كدة الكل هيسمعك و مش هيقدر يقولك تلت التلاتة كام
-صح و الله كلامك مظبوط قول كمان
-الليبرالية مجمل أفكارها اللى احنا مؤمنين بيها

-طيب
ما تشرحلى كل واحدة فيهم ينوبك ثواب و بالمرة تقولى على طريقة نعمل بيها
الكلام ده و احنا عاوزين نعمل ايه بالظبط بالليبرالية دى
-ده بقى المرة الجاية ان شاء الله عشان محطة الدقى جات و انا هنزل
-ماشى
-خد بالك من نفسك يا بيومى و نتقابل بكرة
-ان شاء الله
-السلام عليكم و رحمة الله و بركاته
-و عليكم السلام و رحمة الله و بركاته



بكرة ان شاء الله ليا كلام مع بيومى هنقله ليكم

حلو الموضوع دة يا احمد
استمر انا ف انتظار المزيد

طبعا النهاردة قابلت بيومى و كملنا كلامنا و حوارنا عن معنى و اهداف و سبل تفعيل الليبرالية
و ده كان الكلام

-صباح الخير يا بيومى
-صباح الفل
-ازيك النهاردة و عامل ايه ؟
-الحمد لله
-فاكر وقفنا امبارح لحد فين ؟
-طبعا فاكر لحد افكار الليبرالية و ازاى نطبقها
-طب الافكار كانت ايه يا بيومى
- ضمان الحريات للأفراد
المسؤولية الشخصية للأفراد كل ٍ على حدة
العدالة الإجتماعية
-جميل يا بيومى اكلمك على كل واحدة فيهم بقى
بالنسبة لضمان الحريات للأفراد ازاى يعنى الليبرالية بتضمن لكل شخص سواء مواطن او مسؤول حريات معينة
-ايوة ... زى ايه بقى ؟
-اقولك
زى ايه .. زى حرية التعبير ان كل واحد يقول اللى هو عاوزه ......... حرية
التفكير ان كل واحد رأيه من دماغه و كمان حرية العقيدة و الحرية السياسية
اللى هى حرية الانتخاب و كمان الترشيح
- ده جميل اوى الكلام ده و الفكرة التانية بقى ؟
--المسؤولية لكل الافراد كل على حدة يا بيومى يعنى كل واحد مسؤول زيه زى الوزير و الرئيس و اكتر
- طب ازاى ؟
--
اقولك ازاى ... بإننا نصلح مجتمعنا اللى نشوفه غلط نصححه و اى سلوك مش صح
ما نعملوش و نشارك و نكون ايجابيين و نعبر عن رأينا وكمان نقول مقترحاتنا
لصالح البلد و نفهم دستورها عشان نكون عارفين اللى لينا و اللى علينا
و ما نخونش بلدنا بالسكوت على اللى بيحصل فيها يا بيومى و عشان كدة انا بكلمك و بوعيك
-ربنا يخليك ان شاء الله بعد ما اتوعى كدة مش هسكت على حقى و هكون عرفت ازاى اخده و اطالب بيه طب و التالتة بقى ؟
-التالتة يا سيدى العدالة الاجتماعية هى أن يحتل كل فرد في المجتمع المكانة التي يستحقها، وهي مكانة ترتبط بقدراتالفرد لا علاقة لها بأي مؤثر خارجي، بمعنى أن يكون كل فرد فى المجتمع فى المكان الصحيح و المناسب له وفقا لما يتمتع به منقدرات
فطرية، فيكون جديراً بمكانة أعلى على شرط المساواة فى المعاملة و تحقيق
العدالة فى كل شئ و المساواة امام القانون و امام الناس أي أن الناس كلها زى بعض و متساوية لا يفرقها و لا يميزها دنيويا إلا الكفاءة و القدرة على العطاء
-طب ماهى الفلوس بتحدد القيمة للبنى ادم فلازم الاجور تكون قريبة من بعض
مايبقاش واحد عنده 7456 مليار و واحد تانى مش لاقى يا كل و لا انا بتكلم
غلط ؟
-لا يا بيومى انت صح جدا جدا لازم تقليل الفوارق بين الدخول عشان نحافظ على العدالة الاجتماعية .
-طب قولى بقى انا كدة فهمت يعنى ايه ليبرالية ممكن تقولى بقى المفروض البنى ادم الليبرالى ده يعمل ايه و يسعى لتحقيق ايه بالظبط ؟
-ده سؤال مهم جدا يا بيومى و اسمحلى اشرحلك بالتفصيل
-اتفضل
-أولا
الليبرالى ده شخص منهجه الحوار السلمى شخص صوته مش عالى و لا بيعترض على
الحكومة و خلاص الليبرالي ينتقد الحكومة بموضوعية بمعنى انه بيقول هو شايف
ايه بالظبط اللى غلط و يحدد مشكلته و أبعاد المشكلة و اللى ممكن تسببه و
كمان لو يقدر يقترح حلول للمشكلة و يطرحها على الحكومة او السلطة فى اطار
الحوار او اى اطار دستورى زى الصحافة الليبرالية او خطاب لمجلس الشعب او
خطاب حتى لرئاسة الجمهورية او المسؤول بصفة مباشرة عن المشكلة دى ....
يعنى لو المشكلة فى التعليم يبعت أبعاد المشكلة و مقترحاتها لوزير التعليم
و هكذا
-يعنى افهم من كدة اننا ممكن بعد ما نفهم و يكون عندنا وعى بالمشاكل اللى فى
بلدنا ممكن نشارك فى حلها عن طريق توصيل مقترحاتنا دى للحكومة من خلال
الوسائل اللى انت بتقول عليها دى ؟
-بالظبط كدة .. و تانى حاجة بقى ...............................
-يظهر ان محطة الدقى جت للاسف
-عموما مش مشكلة ان شاء الله نكمل كلامنا بكرة
-ان شاء الله
-خد بالك من نفسك يا بيومى
-ان شاء الله
-السلام عليكم و رحمة الله و بركاته
-و عليكم السلام و رحمة الله و بركاته



و لسه لكلامى مع بيومى بقية .............. استنونى

مش تتاخر علينا ياعم احمد

بس بجد كلم رائع
وانا بتابعه علشان بفهم حاجات كانت
مش واضحة قدامى

احييك على موضوعك
ف انتظار المزيد

طبعا
اتكلمت مع بيومى النهاردة لأن المترو لسه ما عطلش الحمد لله لأن الشئ اللى
ممكن يخلينى ما اكلمش بيومى تانى هو المترو و لو مش المترو برده لازم نقول
المترو .... عموما ده كان حوار النهاردة

-بيومى باشا صباح الخير
-صباح النور
-عامل ايه النهاردة ؟
-الحمد لله تمام
-الحمد لله
-ها .. هنكمل كلامنا عن اهداف الليبرالية ؟
-طبعا احنا وقفنا لحد فين يا بيومى
-احنا وقفنا لحد طريقة الاعتراض و وسائل الاعتراض القانونية اللى بتتبناها الليبرالية
-جميل نكمل بقى
-اتفضل
-شوف
يا سيدى بعد ما اتكلمنا على المشكلة و ازاى نواجهها و نناقشها و نقترح
تعديلاتها و كل ده هنتكلم دلوقتى على هدف تانى هو المساواة بالمعنى الشامل

-بالمعنى الشامل ؟؟
-ايوة
يعنى الليبرالى لا يفرق بين مسلم و مسيحى و لا اسود و ابيض و لا صعيدى و
لا بحرى و لا عنده اى نوع من انواع التمييز الكل فى الاخر بيعيش على ارض
واحدة و على بلد واحدة و كلهم مواطنين زى بعض
-صح
-كمان
الليبرالى بيحارب الفساد المالى و الادارى و بيحارب الظلم بكل انواعه و
اشكاله بالطرق اللى احنا قولنا عليه و كمان الليبرالية عمرها ما خدمت
مصلحة فرد او اتكلمت على حاجة شخصية
-ازاى بقى الحتة الاخرانية دى ؟
-يعنى
ما ينفعش عشان الوزير ده ما عينش فلان ابن عمة مراتى يبقى الوزير ده وحش و
اطلع بصفتى ليبرالى اعترض على سياسته و على قرارته يبقى انا كدة خنت مبادئ
الليبرالية فهمتنى ؟
-اه كده فهمت خلينا بقى نتكلم عن الليبرالية فى بلدنا

-للأسف يا بيومى الليبراليين الحقيقيين فى مصر يتعدوا على الصوابع
-الحقيقيين ؟؟؟ ازاى ؟
-يا بيومى فيه ليبرالى حقيقى و ليبرالى تقليد
-حلوة دى .... طب فهمنى ازاى
-فيه ناس عمالة تجعجع و على طول الخط ضد الحكومة
بل و بتتطرق لسمعة الناس و سبهم فى شخصهم و شتيمة و قضايا و حاجة بصراحة اخر فضيحة دول فاكرين نفسهم ليبرالين
-طب ازاى نعرف ان ده ليبرالى بجد و ده ليبرالى نص كم ؟
-بيومى !!!
-نعم
-هو انا كنت طول الوقت ده بكلم نفسى ؟؟
-لا انا فهمت
-طيب
من خلال اللى فهمته عن معنى اليبرالية و اهدافها و اغراضها و صفات
الليبرالى تقدر تحكم على الليبراليين مين فيهم صح و مين فيهم غلط
-جميل اوى كدة طب قولى اهم المؤسسات او الاحزاب الليبرالية ؟
-أهم الأحزاب الليبرالية فى مصر الوفد و الغد و جبهة مصر الديمقراطية و المؤسسات بقى ممكن تقول جريدة الدستور و جريدة البديل مؤخرا
-طب مين فى نظرك الليبرالى الحقيقى فى مصر
-من
وجهة نظرى المتواضعة الذى أدرك جزءا كبيرا من معنى الليبرالية مع كامل
احترامى لليبراليين القدامى و الجدد و رغم اختلافى معه فى بعض النقاط إلا
أن رأيى فيه لا يختلف احقاقا للحق هو د. أيمن نور
-انت مختلف مع ايمن نور ؟
-ايوة
فى بعض النقاط مختلف معاه و لكنه فعلا انسان عارض النظام بشكل لائق و بشكل
دستورى و كون حزب و من خلاله كان العمل بشكل قانونى و ترشح لمجلس الشعب و
اعترض على نقاط معينة و كمان ترشح للرئاسة بشكل قانونى يعنى مشيها صح مش
بيجعجع على الفاضى زى ناس ... !
-كدة انا فهمت كل ما يخص الليبرالية عاوز بقى اسأل فى حاجة تانية
-خليها المرة الجاية علشان انا هنزل الدقى زى كل مرة
-ماشى
-خلى بالك من نفسك يا بيومى
-ان شاء الله
-السلام عليكم
-و عليكم السلام و رحمة الله و بركاته