انتصار عظيم في معركة الروتين

نحن نرى الاحداث من وجهة نظرنا و نقدمها اليكم

وبعد طول انتظار يتوفق الطالب المجتهد على نفسه ويحقق نجاح ساحق في النصف الأول من معركته الأخيرة أو نقدر نقول الأولى في حربه ضد الروتين
ابنك خد الشهادة يا أم حماده ... لولولولوي ألف مبروك يابو حماده .. ركعتين شكر لله وحاجه ساقعه وشربات بقى علشان جيرانا في الحته "ونجحنا كله يرقص وفلحنا كله يرقص " و " لو ماكنتش انت تنجحني مين هينجااحني لو ماكنتش انت تظبطني مين هيظبطني " والناجح يرفع إيده علشان هياخد على أفاه
وينتقل الطالب المجتهد من طابور الطلبة إلى طابور العاطلين بدرجة جيد جداً يعني هيقف في أول الصف وبعد كام شهر إيه الأخبار يابو حميد .. والله يا وليد أفندي يا أخويا أديني بدعي ربنا يكرمني بقى وأتنقل لطابور التجنيد .. ربنا يكرمك يابو حميد وان شاءالله تأجيل .. يا عم انت هوا انا قلتلك أنا عاوز تأجيل ولا إعفاء حتى .. امال ايه يا عم انت عاوز تروح تجاهد يعني .. لا بقولك أنا بدعي ربنا أتنقل للطابور بس وبعد كدا تفرج .. اه ماشي يا عم ربنا يوفقك ..وبعد كام شهر .. ايه يابو حميد ازيك يا وليد أفندي وازي المدام والأولاد كدا .. كويسين وبخير الحمدلله .. ربنا يديمها عليكم نعمه .. ايه الأخبار يابو حميد .. (بكل سعاده وبهجة) الحمدلله دخلت الطابور أخيرا .. ياااااااااااااااه كفاره يا راجل وعملت ايه كدا مش تأجيل بردو .. لا والله يا وليد أفندي خلاص أنا كلها كام يوم ومسافر حلايب وشلاتين .. ياااااه إيه النحس دا انتي فكرتني بشراره يابو حميد .. يا عم شراره إيه على كدا بقى شباب مصر تماً نحس ووشهم فقر .. كله نصيب وبتاع ربنا والحمدلله على كل حال .. ونعم بالله يابو حميد ربنا يوفقك .. وبعد كاااااااااااااام سنه .. ازيك يا وليد باشا إيه الأخبار كدا .. الحمدلله تمام أحمد ابني اتجوز من 3 سنين أهو وأدينا بنجهز أخته علشان هتدخل في 7 الي جاي .. بالتوفيق ان شاءالله يا وليد باشا وربنا يتمم بخير .. امال مين الصغير دا إبنك ؟ ... ابني إيه يابو حميد دا حفيدي .. يااااااه سبحان الله بقيت جد يا وليد باشا .. نعمل ايه بقى يا سيدي حكم الزمن .. وانت عامل ايه في الدنيا دلوقتي يابو حميد .. الحمدلله خلصت الجيش وأديني اتنقلت بفضله تعالى لطابور القهوة ... ياااه دانت حققت تقدم عظيم يابو حميد .. دا كرم ربنا علينا يا وليد باشا .. ربنا يوفقك يابو حميد
To Be Continued